打工仔一世人流流長，跳幾次槽係常識啦！你做左一份Programming 嘅工都有四五年，有一日有間叫 Venturenix 嘅獵頭公司打俾你，話喺 LinkedIn 揾到你個靚仔profile，有荀工介紹俾你。你懷住試下嘅心態，經過幾輪Interviews，前後偷雞請左兩日請假，竟然有offer！你自我感覺非常良好，然後你第二日決絕地請老細食尤魚。
「我加你5% 人工，你繼續留低幫我。依家市道咁差，你好難再揾到依D人工嘅工架喇……(下删一百字)」老細咁同你講。
遇到老細加薪留職，你會唔會因為面子同骨氣而同錢作對？
注意清單：
1.請小心分辨老細係真係重用你定驚請唔到人先留你
打工仔都有尊嚴嘅，都好想有人認同你嘅能力。如果你覺得自己日做夜做，多做無讚，少做必鬧，每日對住部電腦十個鐘，但工作毫無成功感嘅話，咁你要諗清楚老細留你 ，係因為欣賞你嘅能力，定係因為出面再揾唔到你依啲聽教聽話嘅員工。如果係後者，請立刻執定野等last day!
2.適當運用 「誠實的狡猾」
老細問你「做咩要走？」誠實作答方為上策。同佢講有個更好offer之餘，請唔好忘記依個時候係你講價嘅最好時機! 先諗下你係咪真係疊埋心水想轉工，如果你覺得仲有討論空間嘅，你不坊可大吐下苦水 。
「老細，依份工工時太長, 我想俾多啲時間屋企人!」醒目嘅老細自然會主動提出調較下你嘅工時。
「我想放工多啲時間去讀下啲短course 增值下自己!」 醒目嘅老細自然會主動提出資助你學費，將來仲可以回饋公司。
有心留你嘅老細，依啲門面野都會做下。如果老細問完你但無咩表示，你知咩事啦！
3.發展空間在哪？
諗野諗遠D，諗下依份工仲有無空間發展。例如生活工作平唔平衡，工作機會、員工福利、工作成就感等等有無令你想留低嘅意慾。如果當初想走係因為老細難梗，同事討厭，就算加左人工，工作環境都唔會有咩改變，咁又何必呢？
問自己加薪幅度值唔值得你放棄新offer ？新工俾到你嘅係咪遠照於錢？
記住要諗清楚！唔好因為老細留你而輕飄飄。你個人留低，但個心留唔到，咁對兩方都無好處！下一篇繼續看辭職前要三思！
編輯精選：
