喺依個電子爆炸嘅年代, 唔講都知 IT 人揾工著數啦。有幾好景？根據Glassdoor 近期嘅調查，十種喺美國最賺錢嘅行業有四個IT 行業（UX設計師，產品經理，軟件工程師，系統工程師）都榜上有名。其實香港都不相伯仲。
我地一齊黎探討下產品經理同埋用戶體驗設計師究竟係乜東東。
產品經理 Product Manager (年收入: HKD $707,405)
PM 係一件產品嘅最高領導人，通常都會有做專案經理 (Project Manager) 或者方案架構師 (Solution Architect) 嘅經驗。而PM 嘅主要任務就係去塑造一個新嘅產品。除此之外，PM其實仲有好多唔同嘅角色，由制定推銷策略到真真正正將產品推出市場，都要一腳踢。PM固然要以客為上，但要做一個高層次嘅PM要除左要顧住客人嘅要求，亦要對產品嘅獨特性有全面嘅理解 ，為嘅就係透過研發產品，為用家帶來生活上嘅便利。
以手提電話為例，以前未有IPhone嘅年代 ，可能大眾偏好襟大啲嘅制，外型有多啲顏色選擇等等，PM改良或者研發新產品嘅時候，好自然地就會為左增加銷量，而去迎合顧客同埋市場需要。但現代有腦嘅PM嘅角色係話俾顧客知 ＂究竟佢地應該需要啲咩？＂。Steve Jobs就係一個典型例子，佢重新為手提電話定位，覺得touch mon同埋有無限功能先係大勢所趨，成功創造出一件有前瞻性嘅產品 。所以話呢，做PM唔難，做一個創造潮流，高層次嘅PM先難！
用戶體驗設計師 UX Designer (年收入: HKD $755,219)
從事用戶體驗的設計師咁好pay 係因為佢地責任重大。除左要有基本嘅設計美感外，仲要去呈現自己的設計思考同埋方法論，去了解用者嘅習慣喜好， 用而去改良一件產品。而佢地嘅工作離不開一套特定嘅流程，包括資料搜集，研發設計同埋無限次試驗。以設計網站為例，UX Designer要去吸引用者，就要以版面設計，或者點擊鏈接黎增加網站嘅可達性，可讀性同埋可伸縮性。咁如果增加到網站嘅流量, 商業效益亦可以達到。
其實依家好多外國嘅學院 (例如General Assembly)都會提供一啲用戶體驗嘅證書課程。如果你有興趣喺依行發展，不妨考慮去報下依啲課程黎裝備自己，迎接一啲新機會。做產品經理同埋用戶體驗設計師 咁好景, IT 專才唔駛局限自己嘅，大膽啲接受新挑戰！
伸延學習:Data scientist 入門秘技
